حكاية قطة و عصفورة

الصور كلها بجد تحفة
لذيذ اوي ان القطة بتلعب مع العصفورة عادي كدة و بيقضو وقتهم
و فكرتني بحكاية حصلت مع قطة من قططي و انا صغير

القطط وجبتها المفضلة العصافير
اسالوني انا
كذا قطة شفتها بتشوف عصفورة عينيها تتطق شرار
ده شراني و انا عارفه

فيوم من ايام الشوارع
ايام مكنت صغير بقي
في عصفورة جناحها اتكسر ووقعت
العيال كلها فضلت تلعب بيها و كانو هيموتوها
عملت نفسي حنين و خدتها البيت عندنا
قلت لحد ما تتداوي و لا حاجة
يدوبك دخلت بيها البيت لقيت لولو عينها هتطق شرار
و كان باين عليها اوي انها عاوزة تاكلها

بس
العصفورة خافت منها فالبيت و فضلت تطير بنص جناح فالبيت و احنا مش عارفين نجيبها خالص
احنا نجري وراها
و لولو تجري بردو
بس فالاخر استقرت فوق الدولاب فوق
سيبناها و طلعنا لولو بره البيت
بعد طبعا ما شفناها بتحاول تطلع الدولاب عشان تحاول تجيب العصفورة دي

تاني يوم بنبص فوق الدولاب ملقناش العصفورة
طلعت بره البيت علي السلم لقيت ريش
:(
و لولو كانت قريبة بردو
بس
كلتيها يا رخمة
كليها اشربيها
:(

بس خلاص
العصفورة اتاكلت و توتة توتة فرخة الحدوتة
و عارف انها ملتوتة


ميييييييييييييييييييييييييييييييييييييييييو

موّت قطة و انا صغير

مش عارف اية الي فكرني بالحكاية دي دلوقت
جايز عشان زعلان شوية
جايز عشان خنقة الامتحانات
جايز بضيع وقت عشان مليش نفس ازكر حاجة
مش مهم

بس الحكاية دي كانت سر
مقلتهاش لحد
عشان ندمان عليها لحد دلوقت
مع انها من غير قصد و كنت اصلا فابتدائي

الحكاية
زمان قطتنا لولو خلفت قطة تانية صغيورة كدة و حلوة
بس كانت دماغها و الف سيف تربيها فالدولاب
وسط الهدوم
هي هدوم قديمة و مبلبسهاش
بس برده

ماما كانت كل ما بتشوفها تزعقلنا كلنا و تقول نفس الكلميتين
ارومو بقي القطط دي و ريحوني

فكنا بنحاول نحطلها القطة فكرتونة
بس هي كانت بتشيلها تاني و تحطها فالدولاب تاني
حصلت كذا كرة

فاليوم المشئوم الدنيا كانت ضلمة
مكنتش فاكر انا صحيت ليه بس صحيت و خلاص
كنا شلنا القطة فالكرتونة و لولو كانت بتنقلها كالعادة
فماما سمعت كركبة فالدولاب قالتلي الحق القطة
بتنقل بنتها تاني
فانا جريت
و من غير ما اقصد
دست علي القطة الصغيرة الي انت مكملتش يومين
لسة مغمضة

شلتها فالضلمة و انا مش عارف في اية
حاسس ان حاجة سايلة كتيرة قاعدة تنزل علي ايدي
كنت مستغرب
فتحت النور لقت القطة عشان انا دست علي بطنها سايحة فدمها
بطلع دم من بقها كتير اوي
زعلت اوي و كنت لوحدي و مش عارف اعمل اية

اللحظة بقي الي مش هنساها
اني حطيت القطة بحالتها كدة للولو
القطة علي ضهرها و قاعدة تطلع دم من بقها
لولو كل الي عملتو انها بكل حنية
قعدت تساعد بنتها و بتلحس الدم من علي بقها
كنت حاسس ان لولو زعلانة اوي
بعد ما القطة الصغيرة هديت
بطلت تطلع دم يعني
او خلصت دم بمعني اصح
لولو سابتها
هي كانت بتودع و لولو عرفت كدة
حاولت علي قد ما اقدر اخلي لولو تهتم بيها
بس لولو عارفه انها مش هتعيش فبتسبها تموت
دي حاجة فالحيوانات عامة

ساعة و لا ساعتين
القطة ماتت
لولو طفشت من البيت
و انا قلتلهم القطة لولو و هي بتنقلها خبططها فالحيطة
و ماتت
ايوة كدبت

من ساعتها لولو اصلا مبقتش تيجي البيت كتير
و فاخر ايامها حست انها بتموت خلاص
دخلت نفس الدولاب الي فيه كانت بتربي بنتها
و مكلتش حاجة لمدة 3 ايام او اكتر
و لا اي حاجة و لا لحمة و لا فراخ
جربنا معاها كل حاجة بس منفعش
و لا ميه حتي

و ماتت هي كمان
زي اخواتها




مييييييييييييييييييييييييو

العيد فرحة :D

احم
احد اللقطات للقطة
"لولو"
و كيف تقضي العيد
:D

:)

مييييييييييييو

مخنوق

مخنوق
الكل علي النت بيقول مخنوق
مخنوق
اصلا النت ممل
مخنوق
حتي لما تحاول تتطلع برة عشان ترضي حد ,تخرج معاه ,تقلب خناقة ,متعرفش لية
مخنوق

تحاول تعلمة بس يماطل برده
مخنوق
و انا عارف انك كمان مخنوق لانك بتقرا و مش فاهم اي حاجة
مخنوق
حاجة تغيظ صح
!!!


مييييييييييييييييييييييييييييييييو

للمرة التانية

لما تدخل حاجة من سنتين
و تفشل فيها
بس المفروض بعد ما شفت الدنيا ماشية ازاي فيها
بعد السنتين لما تدخل الحاجة دي تعمل حاجة
بلاه بلاه بلاه
قط فاشل
زهقان من الدنيا
زهقان من البرمجة
زهقان من الكلية
مفيش حاجة جديدة
وقتو ضايع ديما
فاي حاجة
فالنت , النوم , حجات ملهاش لزمة
حتي القطة الي كان حاسس انها هتغيرو
حاست انها هتضيعلو وقتو الضايع
ازاي؟
ده هو كان فاكر ان حياتو هتتغير معاها
كان هيبقي قدامو هدف
كان هينظم حياتو علي امل انو يعمل حاجة جد
بس هي صدته من غير متعرف حاجة
من غير حتي متسالة هو انا كدة بضيعلك وقتك
خلاص مدام انتي شايفة كدة
....

يعم متعملش كدة فنفسك بس
اوعد نفسك انك ان شاء الله هتتغير
و لو فيها نصيب الحاجة الي فدماغك
لو هتروح
هيبقي بجد المرة دي
اعمل حاجة جد مرة فحياتك
ان شاء الله
هتتغير يا قط
حاول بس تستغل وقتك صح
و هيبقي في لعب و انشطة و حجات كتير و جديدة فحياتك
و مزاكرة بردو
بس بقي
انت رغيت كتير علي البلوج
هو ده الي قلنا منضيعش وقت
خش نام بقي
:D
...........

ميييييييييييييييييييييييييييييييو

ماريو

اولا
وصفه

ذكر
اصفر او برتقالي زي الصورة عاش معايا من
اول ما اتولد لحد حوالي 6 سنين


ثانيا
سمناه لية كدة

يعني اكيد من حبنا للعبة ماريو بتاعت الاتاري
(مش عشان استاذ ماريو الي كان فالمدرسة بس الاستاذ ده كان شبهه بجد)


ثالثا
حياتها

مش عارف ابدأ منين و لا منين قط عاش معاك ست سنين
متعرفش ازاي توصفة
بس المهم
ماريو اتولد و انا كنت فزيارة للبلد فاسوان اتصلنا ببابا لقيناه بيقولنا لولو ولدت قط اصفر صغنون رحنا اوي و كنا عاوزين نروح بسرعة عشان نشوفه :)
كان قط زي العسل لسة فاكره لحد دلوقت و هو صغير اخويا الكبير هو الي سماه و احنا وافقنا علي طول
(اصلنا كنا لسة مقفلين لعبة ماريو ^^)
ماريو كان بيحب امه لولو اوي و لحد ما ماتت
بس هي ففترة اول ما جت بوسي و هو بتكرهه و مكملتلوش رضاعه حتي
!!
ممكن بعد كدة افتكرله لحظات من حياته
ماريو كان بيحب اكتر واحد اخويا الي اكبرمني
كان اول ما بيندهه بيقولو تعالي علي علي رجلي يجيلو علي طول مع اني حاولت اكتر من مرة اعمل كدة بس عمرها محصلت
لما كان ماريو بيعمل حاجة غلط هو بيعرف انها غلط يعني سرقه من البوتجاز مثلا او و انت بيهزر معاك يعضك او يخربشك
كان بيفهم و يحاول يهرب منك لما كان اخويا بيضربه عشان عمل حاجة غلط كان بيروح المنور و يفضل ينونو بصوت غريب لحد ما اخويا يصالحو
انا فاكر ان ماريو كان بيحب الشيبسي اوي و اللنشون طبعا
انا فاكر مرة في عيد ميلاده (5 مارس) لسة فاكره جبناله كيسين شيبسي و لا حاجة و بجنية لنسون هاص فيهم
الجانب المظلم بقي بنت عمي الصغيره الي كانت بتمسك ماريو و تفضل تضرب فيه و انا عملت مشاكل كتير مع عمي عشانها
يال مش فارقه
الي خانقني بقي ان اعمامي الي فوقينا بدأو يتكلمو عشان مرات عمي قال اية بتخاف من القطط و دلوقتي
بلاش نتكلم فالموضوع ده بدأو يتكلمو عليه بقي و يشتكو كتير


رابعا
مصيرة

فالاخر و بكل غدر و لا حتي استأذنو مننا
مرات عمي عملت نفسها هتدي ماريو اكل و شالتو فشنطة و اديتو لعمي رماه بالعربيه فالمهندسين
grr
بس و معملناش حاجة عشان قرايب بس
مع انو حد عاش معانا 6 سنين
و منعرفش حاجة عنو حتي الان




مييييييييييييييييييييييييييييو

لولو

اولا
وصفها

انثي
هي شبه الي في الصورة بس مكنتش نايمة و من غير طوق
و مأعتقدش كنا لسة جبنا كمبيوتر حتي
:D

ثانيا
سمناها لية كدة

اتسمت كدة زي ما حكيت البوست الي في الحكايات الي قبلية
عشان كانو التلاتة مع بعض و اتسمو
سوسو و توتو و لولو


ثالثا
حياتها

لولوتقريبا عاشت معانا سنة او سنة و نص مش فاكر تقريبا
بس هحاول اقول الي فاكره من حياتها
لولو من بعد ما ماتو سوسو و توتو و هي اوحدها في البيت
كئيبة
هي في الاول و هي صغيرة كانت انشط قطة شفتها
بس اول ما حصلت الظروف دي و كبرت حتي مبقتش تقعد في البيت كتير
في مرة سافرنا البلد من مصر لاسوان و هي كانت حامل
و واحنا في السفر عرفنا انها ولدت قط اول ما رجعنا سمناه ماريو مش فاكر مين الي سماه بس تقريبا اخويا الكبير
بس ماريو ده اكتر قط عمر معانا فالبيت و كان فعلا احسن قط
بس مش هدخل في التفاصيل دلوقتي
المهم
لولو من بعد ما خلفت ماريو و هي بقت رخمة
همها علي المكان الي تلاقي في اكل اكتر
عند الناس الي بتاكل لحمة كل يوم
فبدأت تروح عند عمي في نفس العمارة بس فوقينا
و بدأت بردو عند جيرانا
كلنا مبقناش نحب لولو
حتي ماريو ابنها مبقتش تعبرو
مع انو كان بيحبها اوي

بعد فترة
لولو كانت حامل مرة تانية
و القطط عامة بتدور عند المكان الي هتخلف فيه قبلية بفترة
فاختارت المكان عند الجيران
و يا ريتها ما عملت كدة
صاحبت البيت التاني و هي بتخلف جريت وراها وضربتها
و ده كان صعب عليها
بس هتروح لمين
طبعا ملقتش الا بيتنا الي تكمل فيه ولادة
يادوبك خلصت ولادة و سابت ولادها خالص
كانو خامسة
!!!
ماكنتش معتبراهم ولادها اصلا
ده كان بسبب الي حصل
القطط دي دماغها غريبة
!!
كنا متغاظين منها اوي و بنحاول نوريلها ولادها
بس هي كان عندها لا مبلاة
لدرجة اننا حبسناها و حاولنا ان ولادها يرضعو منها
بس هي مرضتش و خرجت من البيت بسرعة
!
طبعا ماتو لاننا معرفناش نعملهم حاجة
دول لسة حتة لحمة
كنا خلاص جبنا اخرنا من لولو دي
هي اصلا مكنتش بتقعد في البيت
هو في سبب عشان مظلمهاش
مرات عمي كانو عاوزين قطة
فاخويا كان لقا قطة غلبانة في الشارع صغيرة تنقع تتربي
فجابها و نضفها و اداها لعمي بس هو رفض
فكان لازم بوسي (ده اسمها) تعيش معانا
هي كانت في نفس سن مايو تقريبا
بس المشكلة ان القطط بتغير من بعضها
ف لولو حست انها مش مرغوب فيها فبدأت تعمل تصرفات غريبة
دي حت ابنها بيقربلها كانت بتضربه ساعات
!!
اه صحيح
في الفترة دي كان عندنا تلت قطط في البيت في نفس الوقت

رابعا
مصيرها

لولو في اخر ايامها كانت حامل للمرة التالتة
بس هي كانت ضعيفة مش مستحمله
جت عندنا عيانة كل الي بتعملو انها نايمة في دولاب هدوم قديم علي شوية هدوم
في اخر يومين ليها ماكنتش راضة تاكل اي حاجة
و لا حتي اللحمة و الفراخ
كانت صعبانة علينا كلنا اوي
:((
ماتت فجأة زي ما اي حاجة بتموت
بصراحة
زعلت عليها اوي
و مايو فضل يومين كدة زعلان بردو علي ما اعتقد



مييييييييييييييييييييييييييييو

توتو

اولا
وصفه

ذكر
كان قط رمادي زي الي في الصورة
انا تعبت لحد ما جبت واحد شبهه


ثانيا
سمناها لية كدة

اتسمت كدة زي ما حكيت البوست الي في الحكايات الي قبلية
عشان كانو التلاتة مع بعض و اتسمو
سوسو و توتو و لولو


ثالثا
حياتها

توتو كان القط بتاع اخويا الي اكبر مني
طبعا كنا لسة صغيرين
توتو كان قط محبوب
تشوفو كدة تحبو علي طول
كان بيحب اللعب اوي
دا الي انا فاكره
كان بيقعد هو في الدولاب زمان
الدولاب ده كان متعة انك تطلع علية و انت صغير
:D:D:D
بس كان فيه حاجة غريبة
"كرش جانبي"
هههههههههههههه
بس طبعا ملقتش صورة بالكرش ده
:D
كان مرض عندو بس هو كان قط طيب اوي
كنا بنحب نرقصو و كان منظرو فظيع بكرشو الجانبي
انا مش ناسي الكلمة دي من صغري
هي عاشت اكتر من سوسو بشهر كدة
ده الي انا فاكرة



رابعا
مصيرة

لقيناه ميت فوق الدولاب
و طبعا كلنا زعلنا عليه اوي
و لولو بقت لوحدها من غير سوسو و توتو
:( :(





مييييييييييييييييييييييييييييو

سوسو

معلش بقي
نسيب الاسلوب البلاغي اللذيذ
شوية كدة
و نرجع لحكاياتي بالعامية

اولا
وصفها

انثي
هي شبة القطة الي في الصورة تقريبا
بس كانت هجينة شوية بالون الاصفر


ثانيا
سمناها لية كدة

اتسمت كدة زي ما حكيت البوست الي في الحكايات الي قبلية
عشان كانو التلاتة مع بعض و اتسمو
سوسو و توتو و لولو


ثالثا
حياتها

سوسو كانت القطة بتاعتي من التلت قطط
كانت صغيرة عندها تقريبا شهر لما جبناها
كانت بتحب اللعب اوي
انا فاكر لحد دلوقتي ازاي كنا بلعب مع بعض
بس يا خسارة
مكملتش اسبوع و ظهر عليها انها عيانة
كانت بتنام طول الوقت
و بدات كمان عينيها تقفل من العماص
كانت صعبانة عليا اوي
:(


رابعا
مصيرة

ماتت بعد المرض الي كانت مرضانه بيه ده
و كنت صغير باين في اولي ابتدائي
و قعدت اعيط عليها جامد

في الاخر
هفضل فاكرك يا سوسو



مييييييييييييييييييييييييييييو

سوسو و توتو و لولو

انا عارف ان دول ثلاث اسامي بتاعت اولاد عم بطوط في قصص ميكي العربية
بس ده اسم سمناه لثلث قطط عندنا

هحكي عنهم واحدة واحدة
بس لازم الاول يتحكي عنهم مع بعض

الي انا فاكرة
اني كنت في ابتدائي كدة
و كنت ماشي مع اخويا الاكبر مني
احنا كنا بنحبب القطط اوي و كنا بنحب نشوفهم

فكانفي ثلاث قطط علي الارض قدام محل كهربائي
وقفنا انا و اخويا نتفرج عليهم
لقينا صاحب المحل قلنا
عاوزين تاخدوهم
انا و اخويا بصينا لبعض
و وافقنا

هما كانو يمكن عندهم اسبوعين
كانو مفتحين بس لسة ميعرفوش يجرو

اخدناهم معانا البيت و الراجل ادانا نصف كيلو لبن عشان نشربهلهم
بس مكنتش هتفرق احنا كنا هناكلهم كويس

روحناهم و اختارنا الاسامي دي
كنا تلت اخوات ولاد
كل واحد قال ان واحدة بتاعتو
و انا كان نصيبي سوسو

هبقي احكي بقي اية الي حصل مع كل واحدة ان شاء الله

مييييييييييييييييييييييو

الباز تو

ده تاني قط هحكي عنة
انا مش فاكر عنة كتيير عشان مشوفتوش كتير
و ملوش تقريبا مواقف معايا


اولا
وصفه

ذكر
لونة رمادي في اسود
هو مش زي الي في الصورة اوي
عشان هو كان كبيير شوية


ثانيا
سمناها لية كدة

اتسمي كدة
عشان كان الباز افندي لسة في دماغنا
و هو كان شبهه شوية يعني


ثالثا
حياتة

انا كل الي فاكرة ان القط ده كان بيتردد علي البيت لمدة
نصف سنة مثلا
احنا مربيناهوش من صغرة
هو كان جية كبير

بس كان علية حتة صوت
عاااااووووو
انا لسة فاكرة

رابعا
مصيرة

تقريبا بردة اختفي فجاة زي الي قبلية


في الاخر
انا متكلمتش عنك كتيير معلش
بس انا معرفش عنك حجات كتيير
سلام يا باز تو


مييييييييييييييييييييييييييييو

الباز افندي

ده اول قط انا عشت معاة
مقدرش طبعا احكي علية كل حاجة
بس هحكي الي هقدر علية


اولا
وصفه

ذكر
لونة ابيض في اسود و ديلة اسود و في اخرة 10 سم ابيض
انا اتكلمت عن الديل عشان هو القطة الوحيدة الابيض في اسود الي شفتها فيها الذيل ده
كل ما اشوف قطة ابيض في اسود اشوف ديلها بيكون كلة اسود
ده طبعا في مصر


ثانيا
سمناها لية كدة

اولا مش انا الي سمتها ده اخويا الاكبر من
و سمناها الباز افندي عشان فيلم ابن حميدو كان توفيق الدقن فية بالاسم ده
و الفيلم ده كان بييجي كتييييير
و كنا متعلقين بية


ثالثا
حياتة

حكاية الباز افندي ده بقي

و انا صغير تقريبا في اولي ابتدائي كنت بلعب في الشارع
لقيت القط ده و هو كان صغير
و كان في قطة والدة في بيت الجيران ابنها شبة القط ده
فانا افتكرتة ابنها
فرحت ارجعة
لقيت انة ده واحد شبهه مش هو
فاخدنا يعيش معانا في البيت
...
تقريبا قعد معانا بتاع سنتين
مش فاكرلة مواقف كتيير
بس و هو كان صغير كان بيلعب كتيير
اه صحيح
افتكرت موقف

احنا بنسيب القطط بتاعتنا تطلع الشارع عادي
فعيل من الشارع الي جنبنا اخد باز
و دول كانو ناس صيع و كدة
و ولاد ميكانيكية و عيشتهم كلها في الشارع

كنا لازم نعمل مغامرة عشان نرجعه
كنت عيل صغير بقي
نزلت الشارع الي جنبنا بتاع تلت مرات
عشان اجيبة
و في الاخر جيبتة و جريت
و روحت علي البيت بسرعة
بس باز كان فاكرنا كلنا
...
في حاجة الي انا مستغربلها
من ساعت ما جبنا باز
و كل ما امشي في الشوارع اغلبية الوان القطط كانت الابيض و الاسود
كنت هتجنن
طب بقيت الالوان راحت فين؟؟
لية فجأة اللون ده؟؟
مش عارف
...
بس كان قط جامد و فاكر اني كنت بحبه اوي


رابعا
مصيرة

اختفي فجأة بعد سنتين
و معرفناش عنة اي حاجة بعد كدة

في الاخر
يا ريت اكون وفيتك حقك يا باز
هفضل فاكرك


مييييييييييييييييييييييييييييو

بس بس

يمكن من ساعة ما وعيت علي الدنيا و عندنا قطط في البيت

دي اول قطة دخلت البيت انا مش فاكر عنها حاجة خالص
عشان مكنتش لسة اتولدت
بس طبعا اخواتي حكولي عنها



اولا
وصفها؟؟

انثي
لونها ابيض
تقريبا شبة الي في الصورة


ثانيا
سمناها كدة لية؟؟

طبعا اي قطة بيشوفها الشعب المصري بيقولها يا بس بس
و احنا دي كانت اول قطة عندنا
فيمكن زي ما اتحكالي والدتي هي الي كانت بتناديها بالاسم ده
يعني والدتي الي سمتها
و بس بس طبعا عشان اس قطة عندنا في مصر بناديها كدة


ثالثا
حياتها؟؟

لما اخواتي كانو صغيرين لقو قطتين صغيرين
جبوهم البيت
و اخويا الكبير اخد بس بس
و اخويا التاني اخد التانية
بس اخويا التاني كان صغير و كدة فموت القطة من غير ما يقصد
و بس بس عاشت

اعتقد انها مكملتش سنة عندنا في البيت
بس هي خلفت مرتين في البيت
و في مرة خلفت اتنين واحدة ماتت
و واحدة فضلت عايشة اكتر من 12 سنة
بس مش عندنا في البيت
كانت قطة شورعية
يعني مبتتمسكش
انا لسة كنت فاكر القطة دي موجودة قريب
بس اختفت فجأة
الله اعلم يمكن ماتت



رابعا
مصيرها؟؟

بصراحة معرفش
مقدرش افتي فيها
مش عارف هي ماتت في البيت و لا اترمت
الله اعلم



في الاخر
بردة هفضل فاكرك يا بسبس مع ان انا مشفتكيش
و بردة موضوعك متقفلش
لو افتكرت عنك اي حاجة هكتبها
بحبك من غير ما اشوفك



ميييييييييييييييييييييييييو

اسماء القطط الي هحكي عنها

يااااااااااااااااااه
انا فاكر ان انا عملت الموضوع ده من الاعدادية
حاولت اكتب كل اسماء القطط الي عدت عليا في حياتي
و كنت عامل ورقة فية تري (شجرة) بكل القطط الي عاشو معانا

انا هكتب الي هقدر اتكلم عنة و الي فاكره
لان فعلا عددهم كبير اوي

1
بس بس

2
الباز افندي

3
الباز تو

4
سوسو

5
توتو

6
لولو

7
ماريو

8
بوسي

9
سيلين

10
رولا

11
مشمش

12
ماصة

13
قطتي

14
سيمبا

هما بجد اكتر من دول الضعف
بس دول الي انا فاكرهم و ناوي ان شاء الله اقول الي فاكرة عن كل واحدة

كلهم وحشوني بجد
فيهم الي مات
و فيهم الي معرفش عنو حاجة
بس
هفضل فاكرهم


ميييييييييييييييييييييييييو